UKA 2001 / 77
Aalisarneq pillugu Inatsisartut inatsisaata allanngortinneqarnissaa pillugu Inatsisartut inatsisissaattut nr. xx, xx. xxxx 2001-imeersussatut siunnersuut.
Nassuiaatit nalinginnaasut
Allannguutit uku takussutissaapput, Naalakkersuisut kissaateqarnerannut sinerissamut qanittumi raajarniarnerup nutarterneqartariaqarneranik. Inatsisip siunertaraa aalisagaqartuarnissaanik siunertap iluani, aalisagartassat Naalakkersuisunit annertussusilerneqartartut tamakkerneqartarnissaasa qulakkeerneqarnissaat. Taamatuttaaq inatsip siunertaraa aalisarneq pillugu inatsit toqqammavigalugu aqutsinerup ammanerusumik ingerlanneqarnissaa.
Naalakkersuisut kissaatigaat sinerissamut qanittumi raajarniarnermi nutarterinissaq piviusunngortariaqartoq, tamannalu pissasoq allat aningaasaliisarfiit peqataatinnerisigut Landskarsi kisiat isumalluutaatinnagu.
Naalakkersuisut isumaqarput, ullumimut naleqqiullugu sinerissamut qanittumi raajarniarnermi angallatit anginerusut pissarsiarineqartarnissaat periarfissarissaarnerusariaqartoq taamatullu periarfissarsiuuttariaqartoq sinerissamut qanittumi raajarniarnermi imminut akilersinnaasunik aalisartitseqatigiiffinnik pilersitsisoqartarnissaa.
Naalakkersuisut naliliipput, sinerissamut qanittumi raajarniarnermi nutarterinissamik siunertaqarneq amerlasuutigut piviusunngortinneqarsinnaasoq inatsit atuuttoq allanngortinngikkaluarlugu uuminngali allannguutissatut siunnersuummik tapiliussinikkut. Taamaattumik Naalakkersuisunit aamma siunertarineqarpoq, angallatit angissusissaannut useqarsinnaassusaannullu killigititanik qaffaanissaq. Allannguutit tamakku atortussanngortinneqassapput nalunaarutinik pioreersunik allanngortitsinikkut.
Inatsisip aningaasatigut aqutsinikkullu kinguneri
Inatsit Landskarsip aningaasartuuteqarnerulerneranik kinguneqassangatinneqanngilaq.
Oqaaseqaatit inatsip aalajangersagartaanut ataasiakkaanut
§ 1 nr. 1-mut
Ukiuni kingullermi marlunni isertitat tamarmiusut 2/3-ii inuussutissarsiutigalugu aalisarnermit isertinneqarsimanissaannik piumasaqarnermut taarsiullugu siunnersuutigineqarpoq appartitsisoqassasoq ikinnerpaamik isertitat tamarmiusut 50 %-inut inuiaqatigiinnit piumaffigineqarneq tunngavigalugu sulinikkut isertitarisimasat ilanngaatigeqqaarlugit.
Aalajangersagaq allanngortinneqarpoq aalisarnerup piniarnerullu iluinni malittarisassat imminnut qanillattorsinnaaqqullugit. Piniarneq aallaaniarnerlu pillugit inatsisartut inatsisaanni nr. 12 -mi 29. oktober 1999-meersumi § 4 imm. 2, nr. 4-mi kiisalu Aalisarneq, piniarneq nunalerinerlu pillugit Inatsisartut peqqussutaanni nr. 13-mi 30. oktober 1998-meersumi piumasaqaataavoq isertitat tamarmiusut 50 %-iunissaat.
Aalajangersakkap nassatarissavaa, ukiuni kingullermi marlunni isertitat tamarmiusut 50-ii inuiaqatigiinnit piumaffigineqarneq tunngavigalugu sulinikkut isertitarisimasat ilanngaatigeeqqarlugit, inuussutissarsiutigalugu aalisarnermit, piniarnermiit, savaateqarnermiit tuttuuteqarnermiilluunniit isertitaasimappata, taava aalisarnermut inatsimmi inuutissarsiutigalugu aalisartutut isigineqarnissamut piumasaqaataasut anguneqarsimassapput.
§ 1 nr. 2-mut
Ingerlatseqatigiiffiit imaluunniit inuit ataasiakkaat pisassiissutinik pigisanik aalisariutit ilaannut immikkoortunut sinerissamut qanittumi aalisartunut pisassiissutigineqartunik pisiortornermikkut pisassiissutit tamarmiusut 6-ii qaangerlugit pigisaqalersinnaannginnerannut piumasaqaammut allannguutaavoq.
Killissarititaasoq 10 %-tinut qaffanneqarpoq, aalisartitseqatigiiffiit anginerusut kattuttarnissaat angorusullugu, taamaalilluni aalisartitseqatigiiffinnik akilersinnaasunik pilersitsisoqartalerniassammat. Ukioq manna pisassiissutigineqartut tamakkerlugit qissimikkaanni 10 %-it amerlaqatigissavaat 3.639 tonsit.
§ 1 nr. 3-mut
Aalajangersakkatigut anguniarneqarpoq ikorfiinissaq pisassat amerlassusileriikkat pisassallu aningaasarsiutaalluartut TAC-siileriikkat nungunneqartarnissaasa qulakkeerusunneqarnerinnut.
Inatsit uuma siulia atuuttoq malillugu, ukioq pisassiivik naanerani aalisarneq unitsinneqartarpoq. Aalisarneq unittariaqartarpoq aalisartitseqatigiiffiit ataasiakkaat pisassiissutigineqartunik tamakkiinngitsoorsimagaluarpataluunniit. Ilisimaarineqarpoq ukiut arlaanni aalisartitseqatigiiffiit pisassiissutigineqartunik tamakkiinngitsoortarnerat naatsorsuutiginngilluinnakkamik sila pissutaalluni aalisarneq kinguaattoortarmat, aserortoortoqarsimappat sivisuumilluunniit amoqqasoqarsimappat imaluunniit soorlu ukioq manna pisutut raajanut TAC malunnartumik qaffanneqarsimangaangat.
Naalakkersuisut isumaqarput, aalisartitseqatigiiffiit ataasiakkaat aningaasaqarniarnerat eqqarsaatigalugu kiisalu inuiaqatigiit aningaasaqarniarnerat eqqarsaatigalugu pingaarluinnartoq inatsisip ikorfiisuunissaa, aalisakkat iluanaarutaasartut TAC-iata nungunneqartarnissaanut, aalisarneq Naalakkersuisut pisassanut killiliisimanerisa iluinni ingerlakkallartillugu aammalu aalisarneq peqassutsikkut illersorneqarsinnaagallartillugu.
Naalakkersuisut isumaqarput ukiumut pisassat amerlassusaannik nikerartitsisarneq tunngaviusumik angallatinit kalaallit nunaanni angerlarsimaffilinnit taamaallaat iluaqutissarsivigineqartassasoq. Naalakkersuisulli aamma nunat allamiunut ukiumut pisassiissutaasartunik allanngorartitsisarsinnaapput, aatsaalli tamanna pippat ukiunik arlariinnik qilersorfiusumik aammali oqimaaqatigiissumik nunarsuarmioqatigiit akornanni isumaqatigiissummik tunngaveqarluni.
§ 1 nr. 4-mut
Inatsimmut immikkoortortap siunertaraa aalisarsinnaanermut akuersissutit tunniunneqarsimasut pillugit paasissutissat tamanut nalunaarutigisarsinnaanngornissaat aamma angallatit ataasiakkaat aalisarsinnaanermik akuersissummik peqaqqaarlutik pisarisinnaasaasa amerlassusaat, tassunga ilanngullugit paasissutissat aalisarnermi pisassiissutinit pisarisimasanut tunngasut, aalisarnerni aalisakkat pisassatut amerlanerpaaffilerneqarsimasut eqqartortillugit. Aammattaaq siunertaavoq inuutissarsiutigalugu aalisarnerup iluani akuersissutit allat nalunaarutigisarsinnaanngornissaannut akuerineqarnissaq.
KANUAANA-mi suliarineqartarput, Naalakkersuisut pisassiissuteqarfigisimasaanni aalisarnerni, pisassiissutigineqartunit pisarineqartunut naatsorsuutit. Tamanut nalunaaruteqarnermi ilanngunneqassapput, pisassinneqartup aqqi aammalu angallatinut pisassiissutigineqartut tamakkerlutik amerlassusaat kiisalu pisat assigiinngitsut tamakkiisumik oqimaassusaat piffimmi pisassiiffiusumi naatsorsorneqarsimasussat. Angallatit nalerai - aalisarfii allorniusat sanimukartut ammukartullu aamma minutsit aggorneri nalunaarutigineqartassanngillat.
Tamanut nalunaaruteqartarnerup siunertaraa pisassinneqarsimasut aalisarnermilu kattuffiit aalisarnermut pilersaarusiornissaanni ikorfiinissaq kiisalu nammineq pisassatut pigisanik ukiumullu pisassiissutinik nioqquteqartarnermik uummarissaanissaq. Tamanut nalunaaruteqartarnissamut aalajangersakkap iluaniipput angallatit kalaallit nunanni angerlarsimaffillit kiisalu nunani allani angerlarsimaffillit. Paasissutissat nalunaarutigineqartassapput taamaakkallartutut uppernarsarneqarnissaasa tungaannut.